=====================
સામગ્રી :-
વડા માટે
૧ કપ અડદની દાળ
૧ કપ મગની દાળ
૧ ચપટી હિંગ
૧ ટી સ્પૂન અધકચરું વાટેલું જીરુ
૧ ચમચો દહીં
૧/૨ ટેબલ સ્પૂન લીલા મરચાની પેસ્ટ (તીખું કરવું હોય તો જ)
મીઠું સ્વાદ પ્રમાણે
તેલ તળવા માટે
દહીં માટે
૧ કિલો દહીં
૨૦૦ ગ્રામ ખાંડ
૧/૨ કપ ખજૂર આમલીની મીઠી ચટણી
૧ ટેબલ સ્પૂન જીરુ, સંચળ, મરીનો મિક્સ પાવડર
૧ ટેબલ સ્પૂન લાલ મરચું
રીત :-
બન્ને દાળને ધોઈને અલગ અલગ પલાળો. ૭ કલાક પલાળ્યા પછી તેને મિક્સરમાં વાટી લો. ઘટ્ટ ખીરું બનાવો. હવે આ ખીરામાં ૧ ચમચો દહીં નાખીને ૧ થી દોઢ કલાક રહેવા દો.
હવે તૈયાર થયેલા ખીરામાં હિંગ, લીલા મરચાંની પેસ્ટ, મીઠું અને અધકચરુ વાટેલું જીરુ ઉમેરીને સારી રીતે ભેળવી લો. હવે ગરમ તેલમાં તળી તેના વડા ઉતારો. બાજુમાં એક વાસણમાં પાણી ભરેલું રાખો. વડા તળાઈ જાય એટલે તેને પાણીમાં નાખતા જાઓ.
૪૦ સેકન્ડ પાણીમાં ડૂબાડી રાખ્યા પછી એક પછી એક તેને દબાવીને પાણી નિતારી લો. અને બાઉલમાં મૂકો.બીજા એક વાસણમાં દહીં અને ખાંડ ભેળવી લો. અને તેને ઠંડું કરવા ૩૦ મિનિટ સુધી ફ્રીજમાં મૂકો.
પીરસતી વખતે એક પ્લેટમાં વડા પાથરો અને વડા ઢંકાઈ જાય તે રીતે તેના ઉપર દહીં રેડીને ફેલાવી લો. થોડી ખજૂર આમલીની ચટણી પણ નાખો. હવે તેની ઉપર જીરુ, સંચળ, મરીનો પાઉડર અને લાલ મરચાનો પાઉડર છાંટો.
No comments:
Post a Comment